Eolas

Is é David Hegarty an Stiúrthóir um Ghnóthaí Dlí agus Beartas. Is abhcóide é agus d’oibrigh sé roimhe seo mar Bhainisteoir Punainne Forfheidhmiúcháin in Oifig an Stiúrthóra um Fhorfheidhmiú Corparáideach. Cháiligh sé mar aturnae sa bhliain 2002 agus d’aistrigh sé chuig an mBarra sa bhliain 2006, áit ar chleacht sé go príomha i réimse na cosanta coiriúla agus na habhcóideachta. Sula ndeachaigh sé isteach in Oifig an Stiúrthóra um Fhorfheidhmiú Corparáideach, bhí sé ina Abhcóide Comhairleach in Oifig an Chomhairleora Dlí Parlaiminte, áit ar chuir sé comhairle ar Choimisiún Thithe an Oireachtais, ar Sheirbhís Thithe an Oireachtais agus ar Choistí Parlaiminte maidir le nithe a bhaineann leis an dlí bunreachtúil, leis an dlí parlaiminte agus leis an dlí riaracháin. D’oibrigh sé freisin mar oifigeach dlí i Misean Smachta Reachta an Aontais Eorpaigh sa Chosaiv (EULEX) agus sa Bhinse Speisialta don Liobáin sa Háig, áit ar oibrigh sé i Seomraí na mBreithiúna le breithiúna idirnáisiúnta a bhí ag éisteacht cásanna lenar bhain an choireacht eacnamaíoch, an t-éilliú, mí-úsáid oifigí poiblí, coireanna cogaidh agus comhcheilg chun sceimhlitheoireacht a dhéanamh.

Is í Sharon Sterritt an Stiúrthóir um Rialachas agus Oibríochtaí Tacaíochta. Bhí poist ag Sharon roimhe seo mar Bhainisteoir Punainne Forfheidhmiúcháin in Oifig an Stiúrthóra um Fhorfheidhmiú Corparáideach agus i ngnólacht cuntasaíochta idirnáisiúnta, áit a ndearna sí speisialtóireacht i réimse na cuntasaíochta fóiréinsí agus na n-imscrúduithe. Le linn na tréimhse a bhí sí i mbun cleachtaidh, tugadh ar iasacht í don ról mar Bhainisteoir Líne Seirbhíse Domhanda um Sheirbhísí Fóiréinseacha agus Imscrúdaithe.

De bhreis ar í a bheith ina Comhalta de Chuntasóirí Cairte Éireann, tá Dioplómaí Iarchéime ag Sharon i gCuntasaíocht Fhóiréinseach (Cuntasóirí Cairte Éireann), i mBainistíocht Riosca, Iniúchóireacht Inmheánach agus Comhlíonadh (Cuntasóirí Cairte Éireann), agus i gCoireacht Chorparáideach, Bóna Bháin agus Rialála (Óstaí an Rí).

Is é David Mc Gill an Stiúrthóir um Imscrúduithe Digiteacha agus Anailísíocht. Tá sé ag obair i bhforfheidhmiú an dlí le 14 bliana anuas. Ba é a phost ba dhéanaí ná an post mar Cheann um Fhóiréinsic Dhigiteach le hOifig an Stiúrthóra um Fhorfheidhmiú Corparáideach.

Tá taithí shuntasach aige ar imscrúdú na calaoise, ar an anailís airgeadais, ar an bhfóiréinsic dhigiteach, ar an bhfionnachtain leictreonach, ar an éirim foinse oscailte agus ar an anailísíocht sonraí, agus bhain sé deimhnithe éagsúla amach sna réimsí sin. Bronnadh céim B.Eng. i gCórais Leictreonacha ar David ó Ollscoil Chathair Bhaile Átha Cliath sula ndeachaigh sé ar aghaidh chun céim M.Sc. i Ríomhaireacht Fhóiréinseach agus Imscrúdú Cibearchoireachta a bhaint amach ón gColáiste Ollscoile, Baile Átha Cliath (COBÁC). Chomh maith leis sin, chuir sé céim B.Sc. i gCeannaireacht agus Rialachas Póilíní i gcrích le déanaí i Scoil Ghnó Iarchéime Smurfit COBÁC.  

Is í Cathy Shivnan an Stiúrthóir um Maoirseacht Dócmhainneachta. Cháiligh Cathy mar aturnae sa bhliain 2011 agus tá Céim Baitsiléara i nDlí Sibhialta aici ón gColáiste Ollscoile, Baile Átha Cliath. Chomh maith leis sin, tá Dioplóma Iarchéime i nDócmhainneacht agus Athstruchtúrú Corparáideach aici ó Dhlí-Chumann na hÉireann agus tá Ard-Dioplóma i gCoireacht Chorparáideach, Bóna Bháin agus Rialála aici ó Óstaí an Rí. Sula ndeachaigh sí isteach san Údarás um Fhorfheidhmiú Corparáideach, d’oibrigh Cathy leis an tSeirbhís Chúirteanna agus i róil éagsúla in Oifig na gCoimisinéirí Ioncaim. Áiríodh leis na róil sin ról mar aturnae i bhfoireann Tráchtála agus Dlíthíochta Rannóg Aturnaetha na gCoimisinéirí Ioncaim agus ról mar Cheann um Aonad Dócmhainneachta na gCoimisinéirí Ioncaim i mBaile Átha Cliath, áit ar bhainistigh sí gach gné de rannpháirtíocht na gCoimisinéirí Ioncaim i leachtuithe, i nglacadóireachtaí agus i scrúdaitheoireachtaí. 

Is é Michael Dillon an Stiúrthóir um Ghnóthaí Dlí. Rinne sé staidéar ar dhlí sa Choláiste Ollscoile, Baile Átha Cliath (COBÁC), áit ar chuir sé Dochtúireacht i nDlí Coiriúil i gcrích freisin. Mar abhcóide in Éirinn, chleacht Michael go fairsing sa dlí coiriúil, sa dlí tráchtála, sa dlí riaracháin, san athbhreithniú breithiúnach agus sa dlí bunreachtúil. D’fhóin sé mar LeasArd-Aighne aonair do Chríoch Thar Lear Oileáin na dTurcach agus Caicos de chuid na Ríochta Aontaithe agus mar LeasArd-Rúnaí de facto do phunann Aireachta a Rannóg Tailte ar feadh breis agus ceithre bliana. Chomh maith leis sin, d’fhóin Michael mar Fheisire (ex officio) i dTeach Tionóil Oileáin na dTurcach agus Caicos agus mar Chomhairleoir Dlí don Reachtas agus é ina Ard-Aighne Gníomhach agus, sa cháil sin, bhí freagracht air as reachtaíocht a rith trí léamha uile an Tí agus, uair amháin, as an mbuiséad náisiúnta a rith. 

Rinne sé ionadaíocht do Rialtas na Stát Aontaithe i gcásanna eiseachadta lenar bhain calaoiseoirí scéimeanna Ponzi, an gháinneáil ar dhaoine agus an smuigléireacht. Rud ba dhéanaí fós, bhí Michael i gceannas ar fhoireann dlíthíochta foirgníochta i bpríomhghnólacht dlí atá bunaithe in Dubai ina dhlínsí dlí choitinn. 

Scríobh Michael an príomh-théacsleabhar dlí choiriúil ar Dhlí na Meisce.

Is í Mary Daly an Stiúrthóir um Airgeadas agus TFC. Chuaigh Mary isteach in Oifig an Stiúrthóra um Fhorfheidhmiú Corparáideach mar Chuntasóir Fóiréinseach, tar éis di cleachtadh roimhe sin i gcáil phríobháideach. Thar thréimhse a gairme, bhí raon leathan ról sinsearach airgeadais ag Mary in eagraíochtaí ilnáisiúnta atá liostaithe go poiblí, in Éirinn agus sa Ríocht Aontaithe araon. I measc na bhfreagrachtaí a bhí uirthi bhí tuairisciú reachtúil, bainistíochta agus rialála a dhéanamh, córais airgeadais a chur chun feidhme agus a fheabhsú, agus roinnt tionscadal domhanda rialaithe inmheánaigh a fhorbairt agus a bhainistiú.

Is Comhalta de Chomhlachas na gCuntasóirí Deimhnithe Cairte í Mary agus tá Dioplómaí Iarchéime aici i gCuntasaíocht Fhóiréinseach (Cuntasóirí Cairte Éireann) agus i gCoireacht Chorparáideach, Bóna Bháin agus Rialála (Óstaí an Rí).

Is í Fallon Judge an Stiúrthóir um Fhorfheidhmiú Sibhialta. Roimhe sin, bhí Fallon ina Cuntasóir Fóiréinseach Sinsearach san Údarás um Fhorfheidhmiú Corparáideach agus, le linn di a bheith ag obair sa ról sin, ghnóthaigh sí taithí fhairsing ar an imscrúdú sibhialta agus ar an imscrúdú coiriúil araon. Roimhe sin, d’oibrigh Fallon i ngnólacht cuntasaíochta idirnáisiúnta, áit a ndearna sí speisialtóireacht i réimsí na dócmhainneachta agus an ghnóthaithe chorparáidigh.  

De bhreis ar Fallon a bheith ina Comhalta de Chomhlachas na gCuntasóirí Deimhnithe Cairte, is comhalta d’Institiúid Cánach na hÉireann í freisin. Tá Dioplómaí Iarchéime ag Fallon freisin i gCoireacht Chorparáideach, Bóna Bháin agus Rialála (Óstaí an Rí), i gCuntasaíocht Fhóiréinseach (Cuntasóirí Cairte Éireann) agus i nDócmhainneacht (Cuntasóirí Cairte Éireann). Chomh maith leis sin, tá céim B.Sc. in Ailtireacht (Ollscoil na Banríona, Béal Feirste) aici.